«Алғысым шексіз»: Алғыс айту күні мен ауызашарға арналған тағылымды кеш өтті

Ауқымды шараға кәсіпкер әйелдер, олардың отбасылары, ақсақалдар мен аналар бірлестіктерінің өкілдері, имам және қоғам қайраткерлері қатысты.

Кеш меймандары ана туралы жүрекжарды әуендермен қарсы алынып, шараның ресми ашылуы «Ассаламуағалейкүм» әнімен басталды. Кеш барысында имам арнайы дуа жасап, бата берсе, ақсақалдар алқасы ақ тілегін білдірді. Ұлттық нақыштағы жарапазан айтылып, Нұрсағила әже бастаған «Аналар бірлестігінің» әжелер ансамблі көрерменге аналық ақ батасы мен әуезді әндерін тарту етті.

Шараның ең толқынысты сәті – «Анаға тағзым» бөлімі болды. Жетістікке жеткен кәсіпкер әйелдер мен олардың сүйенетіні – ардақты аналары туралы бейнеролик көрсетіліп, ел дамуы мен ұрпақ тәрбиесіне қосқан үлестері үшін аналарға арнайы Алғыс хаттар, гүл шоқтары мен естелік сыйлықтар табысталды.

Жиын соңында ұйымдастырушы Батырбекова Күләнда Уәлиханқызы құттықтау сөз сөйлеп, кешті қорытындылады. Қатысушылар ел амандығы мен бірлігі үшін тілек тілеп, естелік суретке түсті.